تعرف علي تقنية Li-Fi انترنت المستقبل



في المقال ده هنتكلم عن تقنية جديدة قال عنها المتخصصين أنها قفزة جديدة ومختلفة في عالم التكنولوجيا. التقنية دي اسمها (Li-Fi) وهي تقنية اتصالات ضوئية لاسلكية عالية السرعة وبتعتمد على الضوء في نقل البيانات. 

طيب مين اللي اكتشف أو ابتكر التقنية دي؟

التقنية دي من ابتكار العالم والبروفيسور أستاذ هندسة الاتصالات هارلد هاس بجامعة ادنبرة باسكتلندا. وقدمها للعالم لأول مرة في عام 2011 خلال مشاركته في مؤتمر (TED Talk) العالمي 

طيب ايه الفرق بينها وبين الWi-Fi ؟ 

خلينا في الأول نتكلم على طبيعة الـ (Wi-Fi) وكيفية عمله... 
هو تقنية الاتصال اللاسلكي اللي بتستخدم موجات الراديو لتبادل المعلومات بدون الأسلاك. كما أنه قادر على اختراق الجدران والحواجز وسرعتة عالية. وفي المقابل، تختلف تقنية الـ (Li-Fi) الحديثة اختلاف كلي عن التقنية القديمة، لان اعتمادها الاساسي على الضوء وسرعتها جبارة. فهي تقدر تنقل البيانات عن طريق الضوء المرئي بتردد أكبر من موجات الراديو بـ 10000 ضعف واللي بيخليها سريعة هو اعتمادها على اضواء الـ (Leds) واللي بتعتبر من أفضل أنواع المصابيح من ناحية السرعة. وفي مجموعة من الأبحاث والتجارب العلمية اتعملت فى التقنية الجديدة دي وكانت النتيجة ان تقنية لاي فاي عندها قدره على إرسال البيانات بسرعة توصل ل1 جيجابت في الثانية. 

وبكده تكون سرعتها أسرع 100 مرة من الـ (Wi-Fi). وفي برضه ميزة بتميز الـ (Li-Fi) عن الـ (Wi-Fi) وهي قدرتها على عدم التشويش على باقي الأجهزة الأخرى أو الشبكات زي أجهزة الملاحة والأجهزة الصناعية وغيرهم، في حين أن الـ (Wi-Fi) بتؤثر على أي شبكة أو أي موجة اخري قريبة منها. 

طيب دي كلها مميزات للـ (Li-Fi) فهل ليه عيوب ؟ ولو ليه عيوب فاي هي عيوبه؟؟ 

بما أن الـ (Li-Fi) بيعتمد على مصابيح الـ (LED) فهي لازم تكون شغالة على طول وده شيء صعب جدا، والحل المناسب للموضوع ده أنه يمكن تخفيض إضاءتها بحيث أنه العين المجردة متكونش قادرة على ملاحظة الإضاءة دي ، ولكن لسوء الحظ الحل ده هيؤثر على سرعه نقل البيانات⁦⁩، فكل ما كانت شدة الإضاءة أكبر كانت سرعة نقل البيانات أكبر. 

وبرضه من عيوب الـ (Li-Fi) أنها غير قادرة على اختراق الجدران، وده بسبب طبيعة الموجة الضوئية، وبالتالي لا يمكن أن تنتقل الإشارة بين الغرف المختلفة في حالة وجود طبقة عازلة تؤدي إلى ارتدادها. 

بس في نفس الوقت الموضوع ده مفيد جدًا في موضوع الخصوصية، فاستخدام الضوء لنقل البيانات في المكتب بس يعني استحالة وجود اختراق من مكتب مجاور لهذا الاتصال طالما أن المكتب معزول بشكل كويس وبيمنع خروج الأمواج الضوئية. أو بطريقة تانية، عملية نقل البيانات في تقنية الـ (Li-Fi) بتكون محصورة في المساحة اللي بيوصل لها الضوء، بالتالي البيانات مش هتتسرب للخارج، وده هيخلي أنه من الصعب على الهاكرز أنهم يوصلوا لأجهزة المستخدمين ويسرقوا بياناتهم أو يستخدموها بأي طريقة ضارة. 

طيب هل في استخدامات أو تطبيقات عملية للتقنية دي؟ 

ايوه ، فعلى سبيل المثال، في دولة الإمارات وتحديدًا في دبي أعلنت كل من شركة (Zero.1) و (Du) في أبريل 2016 عن استخدام تقنية نقل البيانات عبر الضوء بشكل رسمي، حيث تم إنشاء نظام خاص بيتوصل مع أضواء الشوارع التي بتستخدم مصابيح (LED) عشان يحملوا بيانات عليها وينقلوها باستخدام موجات الضوء بس.

إعداد: محمد جمال محمد 
مراجعة: فادي مندي
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -